العقل العراقي احد اهم اسباب فشل الاقتصاد العراقي

علي الكعبي

العراقي يدفع كل شهر مالايقل عن 20 الف دينار للمولد الاهلي وهي ماتكدر توفر اليه جوده وكفاءة وانتاجية  ترضي احتياجاته وبنفس الوقت يستكثر يدفع للدولة 30 الف دينار كل شهر بينما الدولة توفر اليه خدمة كهرباء افضل من الي توفرها الاهلية .
العراقي يدفع لغسل سيارتة بالشهر مو اقل من 25 الف دينار لمحطات الغسل الاهلية بينما لا يدفع اجور الماء الي يغسل بيها نفسه وسيارته وبيته وهي تعادل نفس المبلغ المدفوع شهرياً لغسل فقط السيارة .
العراقي من يدخل المستشفى الاهلي يدفع بدون وجع قلب ويقارن بخدماتها مع خدمات الحكومي الي اذا دفع بيها 3 الاف دينار باص ينشر بالفيس الوصل وكأنما دافع ٣ الاف دولار .
العراقي يدفع للتدريس الخصوصي ويدفع للمدارس الاهلية ويدفع للجامعات الاهلية ومايدفع اي دينار للحكومي ويريد خدماتهم وامكانياتهم تعادل الاهلي .
العراقي يسافر خارج العراق ويصرف افضل صرف ويكعد بأفضل فنادق ومن يروح للاماكن المقدسة يريد كل هاي الخدمات تكون مجانية يبات وياكل ويشرب بدون اي دفع .
العراقي يريد يودع امواله بالمصرف ويريد ياخذ فايدة ويريد من ياخذ قرض ماياخذون منه فايدة .
العراقي يريد السلعة الرخيصة وبجودة الياباني والامريكي والالماني ومن تجيب هذن اله بأسعار عالية مايشتريهن لان يعتبرهم قفاصة .
العراقي يدفع للأسواق مبالغ عالية جداً لشراء المواد الغذائية واذا الدولة رفعت سعر تجهيز المواطن الواحد للمواد الغذائية الى الفين دينار راح يگلب الدنيا .
العراقي يريد كل شي بدون ان يدفع ويريد دفع مبالغ بسيطة من اجل خدمات ممتازة او سلع بجودة عالية .
الاقتصاد العراقي ماراح يتطور اذا مااطور العقل الاقتصادي العراقي ويفكر بالامور بطريقة مختلفة .
راخ تكلي والثروات الي يمتلكها العراق راح اكلك كل هاي الثروات تخدم الناس بطريقة غير مباشرة يعني الدولة مامجبورة توفر فرص عمل لكل مواطن او سكن لكل مواطن او راتب لكل مواطن هي تدعم الطبقات الفقيرة وطبقات المتقاعدين والرعاية الاجتماعية اماالاخرين فلا واحنا جاي نشوف الانفجار السكاني الحاصل بالبلد .
راح تكلي دول الخليج وعايشين عيشة ممتازة واوربا راح اكلك شوفهم شكد يشتغلون و وين يشتغلون بيا قطاع وشوف شكد مطلوبين للمصارف قروض اسكان وسيارات وعمل وغيرها .
كل هاي الدول الغنية عايشة هيج ثروتها موضفتها للدولة واستمرارها وقوتها وتنطي للفقراء والمحتاجين مايكفي حد المعيشة .

 


مشاهدات 748
أضيف 2022/02/09 - 10:06 AM
تحديث 2022/07/01 - 2:58 AM

تابعنا على
إحصائيات الزوار
اليوم 3459 الشهر 3459 الكلي 1790014
الوقت الآن
الجمعة 2022/7/1 توقيت بغداد
ابحث في الموقع
تصميم وتطوير